ગ્રામ ભારતી સંસ્થાની આગવી વિશેષતા એટલે સ્વચ્છતાના સંસ્કાર|A distinctive feature of the Gram Bharati Sanstha is the ritual of cleanliness

ગ્રામ ભારતી સંસ્થાની આગવી વિશેષતા એટલે સ્વચ્છતાના સંસ્કાર

Google ન્યુઝ માં જોડાવા માટે અહીં ક્લિક કરો :

By Weu Network 12, October 2023

- પાટનગરના સાનિધ્યમાં એક સુંદર મજાની સંસ્થા ગ્રામભારતી ભારતના પરંપરાગત ગ્રામ્ય જીવન અને સંસ્કૃતિને જીવંત રાખી સ્વછતાના સંદેશ દ્વારા એક સુંદર કાર્ય કરી રહી છે

- ઉગતી પેઢીને સ્વછતાના સંસ્કાર આપતી આ સંસ્થા

ગાંધીનગર, ગુરુવાર

ગાંધી વિચાર જ્યાં સતત ધબકે છે તેવા ગ્રામ ભારતી સંકુલના પરીસર માટે એમ કહી શકાય કે, સંસ્થા પોતાનામાં આજથી 60 થી 70 વર્ષ જૂનું ભારતનું રળિયામણું ગામડું સમાવીને બેઠી છે. પ્રાંગણમાં પગ મુકતાની સાથે જ પક્ષીઓના કલરવ, વૃક્ષોની લીલીછમ છાયડી, અને ચોખ્ખી હોવાથી મન પ્રફુલિત થાય છે. પરિસરમાં 260 થી વધુ જાતિના 38,000 થી વધુ વૃક્ષો છે. જેમાં 100 થી વધુ તો જાણે પોતાનામાં આખો ઇતિહાસ સમાવીને ઉભા હોય તેવા જૂના અને મહાકાય વૃક્ષો છે. સંસ્થાની એક બીજી ખાસિયત છે કે અહીં પ્લાસ્ટિકનો સુંદર રીતે રિયુઝ કરવામાં આવે છે. પાણીની ખાલી બોટલોને કાપી અંદર સુંદર મજાના નાના છોડ વાવી પરિસરમાં આવેલ દરેક મકાનની આસપાસ લગાવવામાં આવ્યા છે. જેનાથી ત્યાંની શોભા તો વધી જ છે, પણ સાથોસાથ પ્લાસ્ટિકના વેસ્ટેજથી થતું નુકસાન પણ અટક્યું છે. વિશેષ વાત એ છે કે આ બોટલોમાં રોપવામાં આવેલા એક પણ છોડ સુકાય નહીં તેનું ધ્યાન પણ સંસ્થાના વિદ્યાર્થીઓ જ રાખે છે. છોડને પાણી પાવાના કામથી લઈ રસોડા અને ખેતર તથા સાફ-સફાઈના કામ પણ વિદ્યાર્થીઓ જાતે જ કરે છે. તેના માટે તેમને વારાફરતી જુદી જુદી નિમણૂક કરવામાં આવે છે જેમાં મહામંત્રી, સફાઈ મંત્રી, સ્વાધ્યાય મંત્રી, પાણી પ્રકાશ મંત્રી, રસોડા મંત્રી, કૃષ્ણપાત્ર મંત્રી, પ્રાર્થના મંત્રી, જેવા પદભાર આપી ભણતર સાથે તેમના જીવન ઘડતરનું પણ ઉત્તમ કાર્ય કરવામાં આવે છે.