Gujarat

હવે પોલીસ સ્ટેશનમાં પણ નો-રિપીટ થિયરી આવશે : બદનામ પોલીસ સ્ટેશનનો આખો સ્ટાફ બદલાશે
 

હવે પોલીસ સ્ટેશનમાં પણ નો-રિપીટ થિયરી આવશે : બદનામ પોલીસ સ્ટેશનનો આખો સ્ટાફ બદલાશે
 

- રાઈટરથી લઈ પીઆઈ સુધીની બદલી કરી દેવાશે : ગૃહ વિભાગે પોલીસ સ્ટેશન સ્ટાફની વિગતો મગાવી
- અમદાવાદ, સુરત, વડોદરા, રાજકોટ, ભાવનગર જેવા શહેરોમાં બદલી બાદ અન્ય જિલ્લાઓમાં કાર્યવાહી થશે

ગાંધીનગર, મંગળવાર

   રાજ્યમાં અગાઉ પાલિકામાં તેમજ સ્થાનિક સ્વરાજની ચૂંટણીઓમાંનો-રિપીટ થિયરી અમલી બન્યા બાદ હવે આગામી દિવસોમાં પોલીસ સ્ટેશનોમાં પણ નો-રિપીટ થિયરી અમલી બની શકે છે. ગૃહ વિભાગ દ્વારા આ માટે પોલીસ સ્ટેશનના સ્ટાફની વિગતો એકત્ર કરવામાં આવી રહી છે. છેલ્લા કેટલાય સમયથી ગૃહ વિભાગ આ મામલે માહિતી એકત્રિત કરતો હતો અને જ્યાં પોલીસ સ્ટેશનમાં ફરિયાદો વધારે છે તેવા પોલીસ સ્ટેશનોને અલગ તારવવામાં આવ્યા છે અને હવે નજીકના દિવસોમાં ત્યાં નો-રિપીટ થિયરી અમલી બની શકે છે અને બદનામ પોલીસ સ્ટેશનનો આખે આખો સ્ટાફ બદલી નાખવામાં આવશે. સૌ પ્રથમ અમદાવાદ, સુરત, વડોદરા, રાજકોટ, ભાવનગર જેવા શહેરોમાં આ કાર્યવાહી હાથ ધરાશે અને બાદમાં અન્ય જિલ્લાઓમાં પણ કાર્યવાહી કરવામાં આવશે. જે પોલીસ સ્ટેશનોમાં ફરિયાદો વધી છે તેવા પોલીસ સ્ટેશનોને અલગ કરવામાં આવ્યા છે અને હવે નજીકના દિવસોમાં મોટાપાયે બદલીઓ કરી દેવામાં આવશે. 

   પાલિકા પંચાયતથી લઈ અમદાવાદ મહાપાલિકામાં ભાજપ દ્વારા નો-રિપીટ થિયરી અમલી બનાવાઈ હતી. શરૂઆતમાં વિરોધના સૂર ઊઠ્યા હતા અને હવે આગામી દિવસોમાં ગૃહ વિભાગ પણ આ મામલે આગળ વધી રહ્યું છે. છેલ્લા કેટલાય સમયથી ગૃહ વિભાગ એવા પોલીસ સ્ટેશનની માહિતી એકઠી કરી રહ્યું છે કે, જ્યાં ફરિયાદો વધારે હોય અને પોલીસ સ્ટાફ લોકોને મદદરૂપ બનતો ન હોય. આવા પોલીસ સ્ટેશનોની યાદી તૈયાર કરવામાં આવી રહી છે અને નજીકના દિવસોમાં મોટો ફેરબદલ કરવામાં આવનાર છે. અમદાવાદથી લઈ અન્ય મહાનગરોમાં નો-રિપીટ થિયરી અમલી કરાયા બાદ અન્ય જિલ્લાઓમાં પણ નો-રિપીટ થિયરી અમલી બનાવવામાં આવશે. જેમાં રાઈટરથી લઈ પીઆઈની બદલી કરી દેવામાં આવશે. જે પોલીસ સ્ટેશન સ્ટાફ સામે ગેરરીતિની ફરિયાદો ઊઠી રહી છે અને સ્ટાફ સામાન્ય માણસને મદદરૂપ બનતો નથી તેની પણ વ્યાપક ફરિયાદો ઊઠતાં ગૃહ વિભાગ એક્શનમાં આવ્યો છે. અનેક પોલીસ સ્ટેશનોમાં રજૂઆત માટે કે ફરિયાદ કરવા માટે જતા લોકોને કડવા અનુભવો થઈ રહ્યા છે તેની વ્યાપક ફરિયાદો પણ ઊઠે છે ત્યારે આગામી દિવસોમાં આવા અધિકારીઓની બદલીઓ થશે તેમાં બેમત નથી.

હવે પોલીસ સ્ટેશનમાં પણ નો-રિપીટ થિયરી આવશે : બદનામ પોલીસ સ્ટેશનનો આખો સ્ટાફ બદલાશે